Descrición
As “ouriceiras” (noutras zonas de Ancares e Asturias chámanse “corrizas” ou “corripas”) son unhas construcións circulares de algo máis dun metro de altura, erguidas a base de pedras da zona, nas que se gardaban durante un tempo as castañas acabadas de caer das árbores. Este froito está cuberto cunha grosa protección con espiñas abondosas que forman unha especie de ourizo. Ao telas un tempo nestes espazos facilitábase o secado e a súa conservación, ademais de permitir que o froito se puidese separar con maior facilidade. Neste tramo da ruta PR-G 159 Sendeiro de Quintá – Donsal, promovido pola asociación local “Castaño y Nogal”, é posible atopar varios exemplos destas antigas “ouriceiras”, cubertas de abondosos musgos e plantas que, xunto coa contorna singular, nos permiten descubrir múltiples micropaisaxes.
